Aaye kuch abr kuch sharaab aaye
Uske baad aaye jo azaab aaye
Baam-e-Minaa se maahtaab utare
Dast-e-saaqi mein aaftaab aaye
Har rag-e-khoon mein phir charaagaan ho
Saamne phir woh benaqaab aaye
Umr ke har waraq pe dil ko nazar
Teri mehr-o-wafaa ke baab aaye
Kar rahaa tha gham-e-jahaan ka hisaab
Aaj tum yaad behisaab aaye
Na gayee tere gham ki sardaari
Dil mein yunh roz inqalaab aaye
Jal uthe bazm-e-ghair ke dar-o-baam
Jab bhi hum khaanaman kharaab aaye
Is taraah apni khaamoshi goonjee
Goya har simt se jawaab aaye
Faiz thi raah sarbasar manzil
Hum jahaan pahunche kaamyaaab aaye
0 comments:
Post a Comment
Thanks For Comment